Ирыстоны номдзыддӕр фӕндырдзӕгъдджытӕй иу уыди Уӕрӕсейы Федерацийы сгуыхт ӕмӕ Цӕгат Ирыстоны адӕмон артисткӕ Мыстулаты Иринӕ. Ӕмӕ кӕд Ирӕ рагагъоммӕ не ‘хсӕнӕй фӕхъуыд, уӕддӕр ирон фӕндыры цагъд  нӕ  бамынӕг уыдзӕн, йӕ хъӕлӕс хъуысдзӕн ӕнусты дӕргъы. Уымӕн  ӕмӕ Ирӕ йӕ уарзон Иры дзыллӕтӕн цы бирӕ ирон фӕндыры нӕртон цӕгъдтытӕ ӕмӕ зарджыты зӕрдӕагайгӕ мелодитӕ ныууагъта, уыдон дарддӕр адӕммӕ хӕццӕ кӕнынц йӕ бирӕ ахуырдзаутӕ.
Уымӕн ӕвдисӕн сты ӕрвылаз нӕ кадджын ӕмзӕххоны номыл цы рӕсугъд  мадзӕлттӕ арӕзт ӕрцӕуы, уыдон. Фарон Ирон театры залы ацыд Мыстулоны сфӕлдыстады мысӕн изӕр. Уым Ӕрыдоны бынӕттон хиуынаффӕйады сӕргълӕууӕг  Мӕргъиты Артур  рахаста фӕндон, цӕмӕй Ӕрыдоны – Ирӕйы райгуырӕн хъӕуы - ӕмбырд кӕной ӕрвылаз республикӕйы хуыздӕр фӕндырдзӕгъдджытӕ. Ӕмӕ абон уыцы ныхӕстӕн сӕххӕст кӕнын бантыст.

Ӕрыдоны аграрон-технологон колледжы къах авӕрӕн нӕ уыд кадджын уазджытӕй. Хуымӕтӕг аивадуарзджытӕ, стырӕй чысылӕй, стӕй Мыстулоны бирӕвӕрсыг дӕсныйадӕн аргъ чи кӕны, уыцы бирӕ кӕстӕртӕ ӕрбамбырд сты бавзарын сӕ тыхтӕ Мыстулаты Ирӕйы номыл арӕзт Республикон фӕндырдзӕгъдджыты конкурсы.
Хуымӕтӕг нӕ уыдысты жюрийы уӕнгтӕ дӕр… Йӕ сӕрдар - Ирыстоны адӕмон артисткӕ Хуытыгаты Мӕринӕ, Ирӕ йӕ дӕсныйад мады ӕхсыримӕ кӕмӕн радта, фӕндыры зӕлтӕ йӕ уды бӕрц кӕмӕн бауарзын кодта, уый; ноджы дзыллӕтӕн хъулон уарзон чи сты, уыцы дӕсны фӕндырдзӕгъдджытӕ Гуацъӕты Хъазыбег ӕмӕ Гӕздӕнты Еленӕ.
Конкурсы архайынма сӕ курдиат балӕвӕрдтой  ӕстай ӕрыгон фӕндырдзӕгъдӕджы бӕрц нӕ республикӕйы алы къуымтӕй.
Конкурсы уагӕвӕрд куыд амыдта, афтӕмӕй архайджытӕ дих кодтой сӕ нымӕцмӕ ӕмӕ кармӕ гӕсгӕ цалдӕр къордыл: ансамбльтӕ, триотӕ, дуэттӕ ӕмӕ солисттӕ; стӕй 7-12 ӕмӕ 13-18 азы кары ахуырдзаутӕ.
Уыд ма ноджы иу домӕн - ӕнӕмӕнгӕй цы дыууӕ уацмысы ӕвдыстой архайджытӕ, уыдонӕй иу хъуамӕ уыдаид Иринӕйӕн йӕхи, кӕнӕ та кӕуыл бакуыста, ахӕм мелоди. 
Фыццаг сценӕмӕ рацӕуыны бар радтой ансамбльтӕн, стӕй триотӕ ӕмӕ дуэттӕн.  Къордтӕ Дзӕуджыхъӕуӕй (Дзиццойты Жаннӕйы ахуырдзаутӕ ӕмӕ Аивӕдты лицейы студенттӕ), Дигорайӕ, Ӕрыдонӕй (горӕты культурӕйы хӕдзарӕй), Алагирӕй, Беслӕнӕй, Фарныхъӕуӕй,  Ӕрӕфы районӕй ӕмӕ Хъахъхъӕдурӕй сӕ тыхтӕ ‘взӕрстой хуыздӕр фӕндырдзӕгъдӕджы ном райсыныл.
Сӕ фӕдыл ирон фӕндыры фӕлмӕн зӕлтӕй хъусджыты зӕрдӕтӕ ӕлхӕдтой 7-12-аздзыд чызджытӕ ӕмӕ лӕппутӕ Сунжӕйӕ, Чермены хъӕуӕй, Октябрьскӕй, Алагирӕй, Фыййагдонӕй ӕмӕ Дзӕуджыхъӕуӕй.
Йӕ уарзон фӕндыр хъуытаз хъӕлӕсӕй ныззарын кӕнын, базыртӕ йыл разайын кӕнын фӕрнӕй ӕнтыст иннӕ къорды архайджытӕн (13-18 азы кары).  Конкурсантты цымыдисаг, хицӕнхуызон ӕмӕ арӕхтсджын цагъдӕн хъусджытӕ арфӕ кодтой тыхджын къухӕмдзӕгъдӕй. 
Уыйадыл йӕ куыст сӕххӕст кодта конкурсы фыццаг этап. Иннӕ бон та Дзӕуджыхъӕуы Металлургты Галуаны ацыд дыккаг – гала-концерт. Уым ӕппынфӕстаг сбӕрӕг сты конкурсы уӕлахиздзаутӕ.
Жюрийы уӕнгтӕ иу уысм дӕр кӕй стыр курдиатыл нӕ фӕгуырысхо кодтой, уымӕй разынд Тедеты Азӕмӕт Октябрьскӕй, дыккаг къорды архайӕг (7-12 азы). Дыккаг бынаты лӕвар ӕмӕ диплом ӕрхаудысты   Томайты Алыксандрмӕ Фыййагдонӕй ӕмӕ Джыгкайты Дианӕмӕ Октябрьскӕй. Ӕртыккаг бынат та уыцы къорды бацахстой Къомайты Зӕринӕ Октябрьскӕй ӕмӕ Джиоты Анжелӕ Дзӕуджыхъӕуӕй. 13-18-аздзыд солистты ‘хсӕн уӕлахизы уӕлдӕр къӕпхӕнмӕ схызтысты Мелыхъаты Светланӕ Беслӕнӕй ӕмӕ Цыбырты Роберт Бӕтӕхъойӕ. Ӕртыккаг бынат саккаг кодтой елхоттаг Козырты Орнеллӕйӕн Елхоттӕй ӕмӕ Гиголаты Илонӕйӕн Дзӕуджыхъӕуӕй.
Ансамбльты ‘хсӕн фӕндырыл цӕгъдыны стыр арӕхстдзинады ӕвдисӕн сси  Дзӕуджыхъӕуы аивады лицейы къорд. Дыккаг бынат бацахстой Ӕрыдоны горӕты культурӕйы хӕдзары ӕмӕ Ӕрӕфы районы  сывӕллӕтты музыкалон сколайы ахуырдзаутӕ. «Бронзӕйы» хицау систы Фарныхъӕуы культурӕйы хӕдзары ӕмӕ Хъахъхъӕдуры сывӕллӕтты аивады хӕдзары ансамбльтӕ.
ООО «Фӕндыр» сӕрмагонд лӕвар – дала-фӕндырӕй -  скадджын кодта Дзӕуджыхъӕуы аивады лицейы ахуырдзау Сӕлбиты Лианӕйы. Слонты Таймураз та Ӕрыдоны районы администрацийы культурӕйы сӕргълӕууӕг Дзугаты Людмилӕйы къухӕй райста зӕрдылдарӕн лӕвар. Фӕндырыл цӕгъдгӕйӕ стыр арӕхстдзинад чи равдыста, уыцы архайджытӕн – Цыбырты  Роберт, Езеты Адӕйӕн, Цгъойты Айратӕн ӕмӕ Хъӕцмӕзты Сӕрмӕтӕн -  Мыстулаты мыггаг саккаг кодта сӕрмагонд лӕвӕрттӕ. Гран-при ӕмӕ Мыстулаты Иринӕйы лӕвар жюри радта Хайты Миланӕйӕн Дзӕуджыхъӕуӕй.
Цӕмӕй конкурс каджынӕй ацӕуа, ууыл зӕрдиагӕй бакуыстой Цӕгат Ирыстоны культурӕйы министрады, традицион культурӕ ӕмӕ этнотуризмы республикон Центыр «Фарн»-ы, Дзӕуджыхъӕуы Металлургты галуаны ӕмӕ Ӕрыдоны бынӕттон хиуынаффӕйады кусджытӕ. Конкурсы амонӕг -  районы администрацийы культурӕйы управленийы специалист Дзугкойты Зинӕ йӕ уды арт снывонд кодта ахсджиаг хӕсӕн - мадзалӕй райрӕзын кӕнын ӕцӕг ирон фӕндыры бӕрӕгбон. Стыр бузныгӕй дзы баззадысты канд ӕрыдойнӕгтӕ нӕ, фӕлӕ уыцы бон конкурсмӕ чи ‘рбацыд,  ӕппӕт уыцы адӕм.

• < Назад
• Вперёд >