DutchEnglishFinnishFrenchGerman
Расписание уроков в СКАТК
Уникальное видео, обычаи и обряды Осетии. Лучшая подборка от нас

Ивгъуыд къуыри Цӕгат-Кавказы аграрон-технологон колледжы галуаны ацыд ирон ӕвзаг ӕмӕ литературӕйы бӕрӕгбон.
Мадзал иумӕйагӕй бацӕттӕ кодтой Ӕрыдоны районы культурӕйы галуаны кусджытӕ, колледжы ахуыргӕнджынтӕ ӕмӕ Ӕрыдоны ӕртыккаг рӕвдауӕндоны хъомылгӕнджытӕ.
Бӕрӕгбон байгом кӕныны бар лӕвӕрд ӕрцыд ӕппӕты кӕстӕр фӕлтӕры архайджытӕн. Ӕртыккаг рӕвдауӕндоны сабитӕ сӕ разамонӕг Бесаты Мӕринӕимӕ ацы бӕрӕгбонмӕ сӕрмагондӕй бацӕттӕ кодтой зарӕг «Ирон ӕвзаг». Уыдоны фӕрцы ирон мелодийы рӕсугъд зӕлтӕ айхъуысдысты галуаны алы къуымты, ӕмӕ, раст хуры тынтӕ куыд батавынц уазал бон, уыйау ӕхсондзинад ӕрхастой ӕрбацӕуӕг адӕмӕн.
Сценӕ срайдзаст кодтой сӕ курдиаты цӕхӕрӕй ӕртыккаг рӕвдауӕндоны сабиты иннӕ къорд (ахуыргӕнӕг Байсӕгъуырты Мӕринӕ) дӕр. Чысыл ирон дзырды дӕснытӕ афтӕ аив бакасты ӕмдзӕвгӕтӕ мадӕлон ӕвзагыл, ӕмӕ хъуысджыты зӕрдиаг къухӕмдзӕгъдӕй галуан байдзаг.


Сӕ фӕдыл ӕрбацӕуӕг адӕмы зӕрдӕтӕ барухс кодтой сӕ рӕсугъд зардӕй культурӕйы сгуыхт кусӕг Хъуылаты Фатимӕйы ахуыргӕнинӕгтӕ. Сывӕллӕтты вокалон къорд азарыд зарӕг «Хуры тынтӕ».
Хъусджытӕ стыр аргъ скодтой Хъуппеты Мӕдинӕ ӕмӕ Гутынаты Маирбегӕн (разамонӕг Хъуылаты Фатимӕ) дӕр. Уыдон иумӕ азарыдысты диссаджы рӕсугъд ирон лирикон зарӕг «Цы сусӕг кӕнон». «Ирыстон» - афтӕ хуынд иннӕ зарӕг, кӕцы Мӕдинӕ ӕмӕ Маирбег балӕвар кодтой галуаны уазджытӕн. Уыдон та ӕнӕкӕрон къухӕмдзӕгдӕй барӕссугъд кодтой курдиатджын зарӕггӕнджытӕн сӕ ацыд сценӕйӕ.
Ирыстон у бирӕнацион республикӕ. Иры зӕххыл бирӕ азты лымӕнӕй цӕрынц ирӕттӕ, уырыссӕгтӕ, сомихӕгтӕ, гуырдзиӕгтӕ, кӕсгӕттӕ, цӕцӕйнӕгтӕ, азербайджайнӕгтӕ ӕмӕ ӕндӕр адӕмыхӕттытӕ. Уымӕн ӕвдисӕн у зарӕг «Осетинка», кӕцы мадзалы азарыд Гутынаты Маирбег.
Рад ӕрцыд сӕ арӕхстдзинад равдисын колледжы фӕсивӕдӕн дӕр. Плиты Сӕбинӕ, Бирӕгъты Арсен ӕмӕ Лабодина Изабелла бакастысты ирон ӕмдзӕвгӕтӕ ӕмӕ раргом кодтой алкӕмӕн дӕр, куыд уарзынц сӕ мадӕлон ӕмӕ ирон ӕвзаг.
Ирон ӕгъдау ӕмӕ царды фӕтк баззадысты ирон кӕфтыты дӕр. Ӕвзыгъд студентты кафджыты къорды хӕс уыд – равдисын, куыд ис Хонгӕ-кафты буары ӕвзазӕй равдисын зӕрдӕйы ахаст, ӕнкъарӕнтӕ. Лабодина Изабелла, Абайты Валерия, Джанайты Наталья, Дзугаты Давид, Саракаты Тамерлан, Мӕзылуаты Зелимӕн уый иттӕг хорз бантыст.
Мидисджын разынд, колледжы студенттӕ цы равдыст бацӕттӕ кодтой, уый дӕр. Сы чысыл сценкӕйы «Горӕтаг чындз», зӕгъгӕ, хӕдахуыр артисттӕ, ӕлхыскъӕмхасӕн ныхасӕй пайда кӕнгӕйӕ, бахудтысты ӕрыгон фӕлтӕры ӕнӕмӕтдзинадыл, сӕ мадӕлон ӕвзагыл кӕй сыстырзӕрдӕ сты, ирон ‘гъдау ӕмӕ традицитӕй сӕхи кӕй атигъ кодтой, ууыл. Аивӕй дзы зынд, цы цӕстӕнгас дарынц Бирӕгъты Арсен, Гасишвили Тамаз, Абайты Валерия ӕмӕ Лабодина Изабелла уыцы фӕткмӕ.
Студенттимӕ зӕрдиагӕй бакуыстой ирон ӕвзаг ӕмӕ литературӕйы ахуыргӕнджытӕ Габиты Мэри, Хохойты Аллӕ ӕмӕ Дулаты Зӕлинӕ.
Мадзалы аразджытӕн ӕмӕ архайджытӕн стыр арфӕтӕ ракодтой колледжы сӕргълӕууӕджы хӕдивӕг Гӕцойты Эльбрус ӕмӕ районы галуаны сӕргълӕууӕг Бязырты Таймураз.
- Абон ацы рӕсугъд бӕрӕгбон иумӕйагӕй куыд бацӕттӕ кодтам, афтӕ дарддӕр дӕр иумӕ куыд архайӕм нӕ мадӕлон ӕвзаг бахъахъхъӕныныл, ахӕм амонд нын стыр Хуыцау раттӕд. Бӕлвырд у бӕрӕгбоны архайджыты фӕлтӕрддзинад, ӕмӕ уымӕй йӕ кад у уӕлдӕр. Нӕ курдиатджын архайджыты фӕрцы мӕн абон бацыд ног стыр ныфс, нӕ мадӕлон ӕвзаджы фидӕн кӕй уыдзӕн рухс. Цалынмӕ нӕ сабитӕ дзурой иронау, уӕдмӕ не ‘взагӕн нӕй фесӕфӕн. Ӕмӕ уый та махӕй аразгӕ у! - загъта Эльбрус.
Бӕрӕгбоны амонӕг районы галуаны методист Хетӕгкаты Аллӕ мадзалы кӕрон бафиппайдта, куыд ахсджиаг хӕс ис ныр ирон адӕмыл, цӕмӕй нӕ фыдӕлты удварны хӕзна лӕвӕрд цӕуа фӕлтӕрӕй–фӕлтӕрмӕ:
«Мах хъуамӕ бахъахъхъӕнӕм цӕстыгагуыйау нӕ фыдӕлты хӕзна – мадӕлон ӕвзаг, уӕм сӕрыстыр нӕ Ирыстонӕй, не ‘гъдӕуттӕй, нӕ адӕмӕй. Ирон ӕвзаджы хъысмӕт аразгӕ у не ‘ппӕтӕй дӕр, ӕмӕ йыл хъуамӕ иумӕ зӕрдиагӕй кусӕм. Сидӕм смахмӕ дӕр, нӕ фӕсивӕд, дзурут иронау, дзурут Къостайы ӕнӕмӕлгӕ ‘взагыл, ма йӕ бауадзут сӕфын, знӕгты къӕхты бынмӕ!».